Kategorier
Амирқул Пўлкан Крилл алифбосида

Амирқул Пўлкан

Армоним

Қўшиқ

Сен гул бўлиб очилдингу кулмадинг,
Кўнгил бўлиб, бир кўнгилдай тўлмадинг,
Айтгил, нега ёр кўнглини олмадинг?
Муҳаббатим фақат сенсан армоним.

Кўз юммасдан ўтказганда тунларни,
Ёдга олдим энг бахтиёр кунларни.
Мен қолиб, сен бахтли қилдинг кимларни?
Муҳаббатим, фақат сенсан армоним.

Бу дунёда сабрсизга тўзим йўқ,
Айрилиқни кўргани ҳеч кўзим йўқ,
Гоҳ ташнаман гоҳо жиндай жазм йўқ,
Муҳаббатим, фақат сенсан армоним.

Биламанки, мени излаб келмайсан,
Мен борганда қани, келгин, демайсан,
Гар келсанг ҳам менинг билан қолмайсан,
Муҳаббатим, фақат сенсан армоним.

Сувдай оқиб ўтиб борар ҳаётим,
Соғинганда учмоққа йўқ қанотим,
Ҳамон ўзинг қалб қўшиғим, баётим,
Муҳаббатим, фақат сенсан армоним.

(”Изҳор” тўпламидан)